තද වැස්සෙන් කොළඹ සහ ගම්පහ දිස්ත‍්‍රික්වල ඇති වූ ජලගැලීම් තත්ත්වය පහව යමින් පවතින අතර මේ වනවිට එම දිස්ත‍්‍රික්යන්හි පවුල් 9148ක පුද්ගලයන් 37897 දෙනකු තවමත් පීඩාවට පත්ව සිටින බව ජාතික ආපදා කළමනාකරණ මධ්‍යස්ථානය පවසයි. අයහපත් කාලගුණය හේතුවෙන් ගම්පහ, කැලණිය ප‍්‍රදේශයේ පුද්ගලයකු ජීවිතක්ෂයට පත්ව ඇති අතර, කොළඹ සහ ගම්පහ දිස්ත‍්‍රික්වල අවතැන් කඳවුරු 16ක පවුල් 1281කට අයත් පුද්ගලයෝ 4962නෙක් තවමත් අවතැන්ව සිටිති. ඔවුන්ට සහන සැලසීමේ කටයුතු අඛණ්ඩව ක‍්‍රියාත්මක බව එම මධ්‍යස්ථානය සඳහන් කළේ ය.

බලංගොඩ මානවයාගේ යැයි සැළකිය හැකි ඇට සැකිල්ලක කොටස් බලංගොඩ කුරගල පර්වතය අසල කැණීම්වලදී හමු වූ බව පුරාවිද්‍යා නියෝජ්‍ය අධ්‍යක්ෂ ජෙනරාල් ආචාර්ය නිමල් පෙරේරා මහතා පවසයි.

බණ්ඩාරවෙලට හා දියතලාව ප‍්‍රදේශයට අද පස්වරු 1.30ට පමණ අයිස් වැස්සක් පතිත වූ බව ප‍්‍රදේශවාසීහු පවසති. විනාඩි 5ක් පමණ අයිස් කැට වර්ෂාවක් පතිත වී ඇති අතර දියතලාව යුදහමුදා කඳවුරට හා බණ්ඩාරවෙල නගරයට මෙම අයිස් වැස්ස ඇදහැළී තිබේ.

(විමුක්ති සංජය පෙරේරා-බදුල්ල )

මාතලේ සමූහ මිනී වළ තුළින් හමුවු අස්ථි කොටස් ඩි.එන්.ඒ. පරික්ෂණයකට ලක්කරන ලෙස ඉල්ලා වර්ෂ 89-90 වකවානුව තුළ අතුරුදන් වූවන්ගේ ඥාතින් 13 දෙනෙකු මාතලේ මහේස්ත්‍රාත් අධිකරණය හමුවේ අද දිවුරුම් පෙත්සම් 13ක් ඉදිරිපත් කළේය.

බදුල්ල-බණ්ඩාරවෙල මාර්ගයේ පහල හල්පේ ප‍්‍රදේශයේ දී අද උදෑසන 8.30ට පමණ සිදුවූ යතුරුපැදි අනතුරකින්  සබරගමුව විශ්වවිද්‍යාලයේ ශිෂ්‍යයෙක් මියගොස් තිබේ. අනතුරින් බණ්ඩාරවෙල හෝටල් පාසැලේ ශිෂ්‍යයෙක් බරපතළ තුවාල ලබා ඇත. අනතුර වූ ලොරි රථයේ රියැදුරා අත්අඩංගුවට ගත් බව ඇල්ල පොලිසිය පවසයි.

පාසල් යන සිසුවකු හා සිසුවියක නිවසින් පැන ගොස් දින ගණනාවක් වෙනත් ප‍්‍රදේශවල අඹුසැමියන් ලෙස ජීවත් වී අක්මීමන ප‍්‍රදේශයේ සිය නිවසට පැමිණි පුවතක් වාර්තා වේ. 14 හැවිරිදි පෙම්වතිය සමග මෙලෙස පවුල් කෑ පෙම්වතා 18 හැවිරිදි අයෙකි.

හබරාදුව, කටුකුරුන්ද ද්විත්ව ඝාතනයට සම්බන්ධ තවත් සැකකරුවන් තිදෙනෙකු ගාල්ල පොලිසිය මගින් අද උදෑසන අත්අඩංගුවට ගෙන ඇත.

මාතලේ ඇතුළු ප‍්‍රදේශ ගණනාවක රෝහල්වල, බස් නැවතුම්පළවල මෙන්ම බැංකු ආශ‍්‍රිතව වයස්ගත කාන්තාවන් සමග කුළුපග වී ඔවුන් සතු රත්ත‍්‍රන් බඩු කොල්ලකෑ කාන්තාවක් මාතලේ මුලස්ථාන පොලිසිය මගින් අත්අඩංගුවට ගෙන ඇත.

මහනුවර දිස්ත‍්‍රික්කයේ කුඹුරු ඉඩම් ගොඩකිරීම සඳහා ව්‍යාජ ලෙස ගොවිජන සේවා කොමසාරිස්වරියගේ අත්සන යොදා ලේඛන සකස් කළ සැකකාරියක අත්අඩංගුවට ගෙන තිබේ.

අමාත්‍ය ඩිලාන් පෙරේරා මහතාට එරෙහිව එක්සත් ජාතික පක්ෂය විසින් පාර්ලිමේන්තුවට ඉදිරිපත් කළ විශ්වාසබංගය වැඩි ඡන්ද 104කින් පරාජයට පත්විය.

ලංකා විදුලිබල මණ්ඩලයේ මේ වනවිට උද්ගතවී තිබෙන ගැටලූ සම්බන්ධයෙන් විසදුම් ලබාගැනීම සඳහා එම ආයතනයේ ස්ථාපිත වෘත්තීය සමිති 53ක පමණ නියෝජිතයෝ අද විෂයභාර ඇමැතිනී පවිත‍්‍රාදේවි වන්නිආරච්චි මහත්මිය සමග විශේෂ සාකච්ඡාවකට සහභාගී වූහ.

දිවයින පුරා රජයේ රෝහල්වල සිටින විකිරණවිද්‍යා තාක්ෂණවේදීන් හෙට උදෑසන 8 සිට අඛණ්ඩ වැඩ වර්ජනයක නිරත වීමට සූදානම් වෙයි. රජයේ විකිරණවිද්‍යා තාක්ෂණවේදීන්ගේ සංගමය පැවැසුවේ ඉල්ලීම් 8ක් මුල් කරගනිමින් මෙම වර්ජනය ක‍්‍රියාත්මක බවයි.

පාසල් සිසුවියකට ආදර හසුනක් ලබාදී අතවර කළ බවට වරදකරු වූ විශ‍්‍රාමික ග‍්‍රාම නිලධාරිවරයෙක් අත්අඩංගුවට ගෙන අධිකරණයට ඉදිරිපත් කිරීමෙන් පසු රක්ෂිත බන්ධනාගාරගත කර තිබේ.

ශ‍්‍රී ලංකාවට ඔබ්බෙන් පවතින  බටහිර බෙංගාල බොක්කේ මේ වනවිට පවතින වායුගෝලීය කැළඹිලි ස්වභාවය සුළි සුළඟක් දක්වා වර්ධනය විය හැකි බව කාලගුණ විද්‍යා දෙපාර්තමේන්තුව පවසයි. අවපීඩන තත්ත්වය වර්ධනය වුවහොත් දිවයිනේ ඇතැම් ප‍්‍රදේශවලට තද සුළං හා තද වැසි ඇති විය හැකි බව ද එම දෙපාර්තමේන්තුව පෙන්වා දෙයි.

බිම වැටී තිබූ විදුලි රැහැන්වල දැවටී විදුලි සැර වැදී පුද්ගලයකු ඊයේ සවස මාතලේ පාරාවත්ත ප‍්‍රදේශයේදී මියගොස් තිබේ. මෙම අනතුරට මුහුණපා ඇත්තේ මාතලේ පාරාවත්ත ප‍්‍රදේශයේ ඩබ්.එච් විජේසිංහ 54 හැවිරිදි තිදරු පියෙකි.